Antía Otero é licenciada en Historia da Arte Contemporánea na USC, realizou un Máster en Historia e Estética do cine na Universidade de Valladolid e formouse como actriz na Escola Espacio Aberto de Santiago de Compostela. A súa traxectoria é interdisciplinar polo que dende sempre ven conxugando a escrita coa arte e a interpretación.

   Como poeta foi gañadora do VII Certamen Francisco Añón de Poesía co poemario De porta un horizonte e publicou o seu primeiro libro individual O Son da Xordeira (2003) en Espiral Maior, así como multitude de colaboracións en revistas (Serendipia), fancines (300 e Zapatiños Motor), catálogos de arte e libros colectivos como:

   Negra Sombra. Intervención poética contra a marea negra. Sempre Mar-Plataforma Burla Negra, Xela Arias, quedas en nós. Poetízate. Antoloxía da poesía galega, Polifonías. Voces poéticas contra a violencia de xénero.

   No campo da Arte ten dirixido un documental sobre Maruxa Mallo, comisariado exposicións, colaborado en diferentes xornais e elaborado textos para catálogos:

- Rolos (Xuventude de Galicia-Centro Galego de Lisboa. Consellería de Cultura, Comunicación Social e Turismo. Xunta de Galicia, 2005)

- A Palabra. Segundo encontro de arte e natureza no Castelo de Soutomaior (Deputación Provincial de Pontevedra, 2005)

- Residentes 05. Bolsas en residencia San Martín Pinario (Consellería de Cultura e Deporte. Xunta de Galicia, 2005)

- Trinta relatos. A creación: dar forma ao que se recibíu con anterioridade (Galicia Hoxe. Revista das letras. Novembro de 2005, n° 593)

- Compostelarte (Auditorio de Galicia. Concello de Santiago. 2007)

   Na actualidade é Vicepresidenta da Asociación de Escritores en Lingua Galega, imparte obradoiros de creación literaria ali onde a chaman, traballa como actriz en teatro e nunha serie da TVG e escribe na súa páxina na rede.

[Maio, 2008]